Mama Rasha (little_smurfs2) instagram photos and videos

Mama Rasha
Mama Rasha

🌺رشا المصري 🌺أخصائية مونتيسوري 🌺مونتيسوري خطوة بخطوة 🌺رحلتي مع احمد&كرم 📍الرياض للتعاون على الدايركت

Mama Rasha all instagram publications

  • followers count: 39,188
  • followers rank: 0
  • likes count: 46,152
  • like rank: 0

Most popular images

Hype medias

الامومة و الشغل أو أمومة لحال. الامومة و تحقيق الذات أو أمومة لحال. ولد واحد أو أكتر من ولدين. أم إيجابية أو سلبية. أم منظمة أو أم حاملة الدنيا كلها بإيد وحدة. أم موترة أو أم رايقة. أم مهتمة بحالها أو أم الباقي على حسابها. يا ترى انتو من أي وحدة فيهن🤔 يلا نتناقش👇❤️ #منتسوري_ماما_رشا #أمومة_رشا

هدية مني لالكن.. اسحبو الشاشة على اليسار. كتاب من أحد كتب ماريا مونتيسوري. هدية مني لكل المتابعين الموجودين عندي. هدية مني لمحبتكن ووجودك عندي بالصفحة. رح اعطيكن لمحة عن الكتاب بشكل مختصر. هاد الكتاب هو نظرة عامة كاملة عن أصول التدريس و الممارسة في المونتيسوري. رؤى جديدة من مجالات علم الأعصاب و نمو الطفل، من خلال مساعدتك على فهم تأثير مونتيسوري على سياسات و ممارسات السنوات المبكرة. يقترح طرقا لجميع الأمهات و المعلمات لتطبيق الأفكار في الممارسة. الكتاب حملته من الغوغل. الكتاب باللغة الإنجليزية رابط الكتاب بالبايو، اكبسو عليه و فورا بتحصلو على الكتاب شكرا على دعمكن المستمر. #منتسوري_ماما_رشا

كيف فيني ضل عم اضحك و مرتاحة نفسيا و كلي طاقة إيجابية؟ 🤔 كتير بتسألوني هاد السؤال،و حبيت احكيلكن بشكل مختصر عن الشي يلي متبعتو بحياتي. عندي قاعدة بحياتي حب حالي لحتى الناس تحبي. اذا بدي ضل قول بيني وبين حالي(انا تعبانه، انا فاشلة، انا ما بقدر اتغير،..) بعمري ما رح كون قدرانه سيطر على هل المشاعر الداخلية. اذا ما شفت الراحة الداخلية يلي موجودة عندي ،الناس ما رح تشوفا ابدا. الرضا الذاتي يلي بحسو بحياتي كل يوم عم يزيد، في جملة بحبها كتير لفيلسوف معروف اسمه ويليام جيمس بقول:( لقد كان أعظم اكتشاف عصرنا هو اننا نستطيع تغيير المظاهر الخارجية لحياتنا عن طريق تغيير الأوجه الداخلية لتفكيرنا) الوجه الداخلي لالي هو نفسه الوجه الخارجي، التصنع مرفوض، الكذب مرفوض، التعامل باحترام مع كل الناس هو الأساس. الرضا الذاتي بحياتي و الحمد الدائم على كلشي انا فيه هاد الشي يلي بخليني كون إيجابية. حياتي متل حياة اي حدا عندو مشاكل كتيرة، بس شو الفكرة من التفكير الدائم بالسلبية، بحاول سيطر على أفكاري السلبية و انسى فورا و اشغل حالي بأي شي. التفكير السلبي يؤدي إلى الاكتئاب. التفكير الايجابي يؤدي إلى السعادة لالي و لكل الناس من حواليه. ما بحب الزعل، ما بحب الأشخاص السلبين ،ما بستنى كلمة شكرا من حدا(انا بشكر حالي)، تطوير فكري و حياتي للافضل هدول بوصلني للايجابية. كل حدا فينا هو قادر على التغيير، و السيطرة على حالة السلبية. يا ترى انتو بتقدرو تسيطرو على الأفكار السلبية؟👇❤️ #منتسوري_ماما_رشا #أمومة_رشا

بس نطلع رح جبلك يلي بدك(عم نضحك عليه وما رح نجيب شي)😢 اذا لبست بسرعة رح اعطيك يلي بدك(وما منعطي)😢 اذا قعدت شاطر، رح اخدك مشوار (و اكيد ما منطلع من البيت)😢. وعود كتيرة بس ولا واحد تنفذ.😕 ليش؟ الطفل مرأة لالنا، و لازم نكون قدوة له. في كتير اهل بيستعملو هاد الأسلوب كرمال يخلصو من نق الطفل او نوبة الغضب او حتى ينفذو يلي بدن ، و بينسو اهم شغلة (الطفل تعلم الكذب) اي نعم، الطفل يلي بشوف القدوة تبعه عم يكذبو بصير متلن و بيتصرف بنفس الطريقة. و هون ابدا ما فينا نلوم الطفل ،لأن تصرفنا بالأساس غير صحيح. لما بدنا نوعد بدنا نوفي، و اذا ما قدرنا نفذ بكل بسيطة منحكي الصدق و منكون صريحين. شو ما كان تصرف الطفل منتحمل و منصبر احسن ما نحاسب طفلنا على شي نحنا كنا سببه. هل يا ترى بتوعدو أطفالكن وما بتوفو بوعدكن؟👇♥️ #أمومة_رشا #منتسوري_ماما_رشا

يييي ليش ابنك كتير حرك، انا ابني كتير هادي. 😳 يييي ليش هيك ابنك هادي، لازم تشوفي دكتور يمكن في شي😳 ابنك ليش ما مشي، ابني لما كان بعمره كان عم يركض 😤 عطي هاد الحليب، افضل و احسن، انا أم وبعرف اكتر منك😤 خلي يخاف منك و استعملي معه اسلوب قاسي مشان يتعلم يكون قاسي😤 و بعدين مع هل النماذج من الأمهات المزعجين. ليش المقارنات، عنجد هاد الشي كتير مزعج و الاحلى انو بيفرضو رأيهن على الأم التانية. كل ولد الله خلقه بعقل مختلف و استيعاب مختلف و شخصية مختلفة. كل أم هي أدرى بحالها و ظروفها وولادها. يلي بتربي ولد مو متل يلي بتربي ولدين او ٣ ولاد. كل أم بتعيش على حسب هي شو بدا مو على حسب الناس. مافي أم فاشلة ،ممكن تكون محتاجة مساعدة فقط. مافي طفل ما بيفهم، كل الاولاد بيفهمو. لا تسمعو لحدا عم يزعجكن. خبروني تجاربكم؟ 👇♥️ #أمومة_رشا #منتسوري_ماما_رشا

#Repost @hasandownlove (@get_repost) ・・・ البوست السادس عن التوعية بمتلازمة داون .. أسئلة عن علاقة المونتيسوري مع أطفال ذوي التحديات الخاصة مع أخصائية المونتيسوري والصديقة اللطيفة المشكورة على دعمها ومشاركتها بالتوعية رشا المصري 💙💛 @little_smurfs2 .. ١- كيف يمكن أن تعرفي لنا نظام المونتيسوري؟ منهج مونتيسوري هو فلسفة حياة، يحاكي نفسية الطفل، يعلّم الطفل الاعتماد على نفسه بحياته بشكل عام، يعتمد الطفل أيضا على تلبية احتياجاته بنفسه. و أيضا يعتمد المنهج على اكتشاف الطفل للحياة من حوله. وأهم نقطة إعطاء الطفل الحرية ضمن حدود. كما قالت ماريا مونتيسوري :(الطفل ليس دمية نحركه كما نريد، الطفل لديه شخصية ومن المفروض ان تنمى بطريقة صحيحة). .. .. ٢- هل نظام المونتيسوري مفيد لاطفال ذوي التحديات الخاصة؟ هل من الممكن استخدامه معهم؟ بالتأكيد، بالبداية أسست ماريا مونتيسوري قاعدتها على مراقبة الأطفال مبتدئة بالأطفال ذوي التحديات الخاصة، ثم الأطفال المحرومين و أخيرا الأطفال من مختلف طبقات المجتمع ومن خلفيات ثقافية مختلفة. و كما قالت مونتيسوري :(بينما كان الناس في منتهى الإعجاب بنجاح تلاميذ المعوقين عقليا، كنت في منتهى الدهشة و العجب لبقاء الأطفال العاديين في ذلك المستوى الضعيف من التعلم. .. .. ٣- هل اذا كان طفلي متأخر عن عمر الطفل المونتيسوري في الأداء هذا يعني فشل النظام معه؟ .. لا ابدا، اندماج طفل من ذوي الاحتياجات الخاصة مع الأطفال العاديين يساهم في تحسن الطفل و زيادة تقدمه.. 🔹🔹 إضافة شخصية: ولا يجوز المقارنة بين طفل من ذوي التحديات الخاصة مع أي طفل آخر.... وأخيراً هاي الأسئلة هي فقط نقطة بداية لكل أم مهتمة كيف تبتدي مع طفلها ليكون مستقل ... وإذا ما حسيتي حالك مرتاحة مه هذا النظام فهيدا مش معناه إنك غلط لا أبداً كل أم قادرة تعرف شو بيريحها وبيريح طفلها.... . . . بليز خبروني اذا عم تستفيدوا بهالبوستات حول شهر التوعية بمتلازمة داون وحابين كفي فيهم أو لا.....وإذا عندكم أي سؤال او استفسار بتمنى تكتبوا بالتعليقات حتى بستفيد الكل من الجواب ... وشكراً كتييير كتييير لدعمكم وحبكم ودعواتكم 💛💙💛💙 . . . . —————————————————— #ملاكي_حسن #توعية_حسن #مونتيسوري #مونتيسوري_بالعربي #مونته #مونتيسوري_بالبيت #اصحاب_الهمم #اكتوبر_شهر_التوعية_بمتلازمة_داون #متلازمة_داون #داون_ساندروم #اطفالنا #امهات #امومة #3a2ilati #hasandownlove #Montessori #montessorikids #downsyndromeawarenessmonth #downsyndrome #t21 #awareness #beirut #lebnen

الاستسلام فظيعة هي الكلمة شو بشعة و تأثيرها سلبي على الإنسان. ليش لنخلي هاد الشعور يسيطر علينا. كتير في امهات بيقولولي رشا خلص انا استسلمت، ابني ما عم اعرف اتصرف معه. ليش منحط ببالنا فكرة انو الطفل ما عم يفهم علينا، ليش ما نحاول مرة و مرتين و عشرة. كل مرحلة بعمر الطفل في تغيرات جديدة، و اذا حسينا بالفشل رح نتعب كتير. بالعكس خلينا نجرب كل الوسائل المتعلقة بالموضوع، و بعدين منقرر شو لازم نتصرف اتجاه المشكله يلي عنا. حاسة حالك مخنوقة، دوري على شي تحبي تعملي و اسعي لحتى يتحقق. حاسة بالأمور عم تطلع عن السيطرة، نظمي حالك و ركزي أفكارك. زوجك ما بيساعدك، ساعدي حالك بحالك. افرحي، عيشي بالهدوء النفسي. لا تستني كلمة شكرا من حدا، انتي اشكري حالك. كيف تغلبتو على فكرة الاستسلام؟ 👇❤️

دورة طفلي سعيد. من أهم الأمور يلي لازم نقدمها لاطفالنا هي السعادة و انو نشوف الابتسامة عن وجوهن الحلوة. الدورة رح تكون شاملة لكل الأمور يلي رح توصلنا نحنا و الطفل للسعادة. تحميل كتب مجانية للمشتركات بالدورة. مناقشة بأخر كل جلسة للمحاور يلي انطرحت. فيديوهات مفيدة جدا لكل أم. الدورة لمدة ٣ ايام الوقت يتحدد بعد اكتمال العدد. للاشتراك التواصل على الخاص.

كم مرة حبنا أشخاص على حسابنا و على حساب راحتنا! كم مرة فكرنا بغيرنا قبل حالنا! كم مرة نسينا حالنا و قلنا بعدين منهتم! كم مرة ضغطنا حالنا و ما انتبهنا على حالنا و على راحتنا! ليش هيك؟! إهمال النفس ابدا مو صح، و اذا بدنا نهتم بالكل و ننسى حالنا، شو منكون استفدنا. تعبنا، زعلنا، مرضنا، بكينا، انأهرنا، انهزمنا بينا وبين حالنا. مين سأل فينا؟ ما حدا ابدا. اذا قدرنا نقدر حالنا و نفيق كل يوم و نشوف حالنا اديش نحنا مرتاحين و اديش نحنا مرتبين أفكارنا، ما رح نحس بتغيير بحياتنا؟ اكيد رح نحس بشي جديد صار معنا. حس النفس ضروري جدا، لحتى نشوف الدنيا حلوة، لحتى نعيش بفرح، لحتى نعيش مرتاحين. لا تقللو من قيمة نفسكن، بالعكس اشكرو رب العالمين على صحتكن و عافيتكن. خبروني كيف بتقدرو نفسكم؟ 👇❤️ #منتسوري_ماما_رشا #أمومة_رشا

هي الحالة الطبيعية لأي طفل و هي الشعور بالملل. حتى ولادي و بالذات احمد كتير كان يحس بالملل و حس انو مافي شي عاجبه، و احتار شو اعمل، بعدين صار كرم يتعلم منه و حسيت الملل رح يسيطر على حياتنا. اذا طلعنا من البيت بملو، اذا ركبنا بالسيارة و مشوار بعيد بملو، قعدنا بالبيت مالين، شو ما عملنا بضلو ينقو و يملو.😕 طيب و بعدين، هيك بدنا نعيش؟ 🤔 اكيد لا، لقيت حلول كتير ساعدتني بتخفيف نسبة كبيرة من الملل(طبعا ما فينا نلغي تماما، بس ممكن نخفف منه) قبل ما نطلع من البيت بخلي شنتة جنب الباب و بقلن حطو فيها يلي بدكن من قصص و ألعاب، مشان و انتو بالسيارة تتسلو. و بس نكون بالبيت، بقسم الوقت كتير و حاول انو يكون كل يوم شي جديد. بخليهن يلعبو لحالن و كل حدا فيهن يختار لعبة او الأداة يلي بدو، و اذا حب يتشارك مع اخوه مافي اي مشكلة طبعا. منلعب كتير انا و ياهن و ممكن كل مرة تكون نفس اللعبة بس بضيف عليها شي جديد أو نلعبها بطريقة مختلفة. النشاط الحركي من أهم شي عندي بالبيت، اغلب الوقت حاطين اغاني و عم نط و نلعب. و غرامن شغل البيت و خاصة كرم بحب يمسح البيت كلو 😂. بصراحة الملل عند الطفل مالو حل نهائي ابدا بس ممكن نخفف منه لان هاد الشعور بوتر الأم كتير و بتحتار شو تعمل. خبروني كيف بتتعامل مع ملل أطفالكن👇♥️ #أمومة_رشا #منتسوري_ماما_رشا

شي مرة حدا فكر فيكن يكتب رسالة لنفسه، يعبر فيها عن كل مشاعره و كل الأمور يلي مرت بحياتو. أنا هيك بعمل، كل فترة بقعد بكتب رسالة لنفسي و بقارنها ب يلي قبل و بشوف شو يلي تغير بتفكيري و تصرفاتي و حياتي. كتير مهم لالي اعرف أخطائي و صلحها. كتير مهم لالي قارن نفسي بنفسي. كل الأمور الصعبة اتخطاها. عندي أمور كتير بدي اتعلمها، و الشخص لازم يضل يدرس و يتعلم ليطور حاله. عندي أهداف كبيرة بحياتي، و عم يتحققو شوي شوي (ما لازم استعجل) أحلامي تحققت الحمد الله قبل الوقت يلي محددتو. لسه عندي أمور بدي اشتغل عليها اكتر و زبطا اكتر. أنا كتير مبسوطة بكلشي بحياتي ،عيشتي مع عيلتي، تربيتي لولادي مقتنعة فيها الحمد الله. صار عندي قناعة،الشخص هو يلي بينجح لحاله،بطور حاله بحاله، المقارنة مع أشخاص اخرين غلط. أنا هلأ بحب حالي كتير ،و بتمنى اني حقق كل أحلامي قبل الوقت يلي حاطتو. خبروني بكتبو رسالة لحالكن؟  و عندكن القدرة على التغيير؟ ♥️👇 #منتسوري_ماما_رشا #أمومة_رشا

ليش دايما منطلب من الطفل أمور ممكن تكون صعبة بالنسبة له، و منحاسبه اذا ما نفذها؟ ليش دايما عنا القسوة و الضرب هنن أسلوب للتربية؟ ليش الاغلب بشوفو الطفل مصدر لعدم الفرح؟ ليش عنا مقولة (هيك تربينا وما صرلنا شي)؟ ليش الطفل دايما بجنن الأم ؟ليش ما نقول انو هو عم يمر بتتغيرات بشخصيته و تطور جديد؟ ليش مننسى ال٩ شهور يلي عاش فيها معك، لحالكن، و حسيتي بكل نبض و كل حركة؟ ليش مننسى اول نظرة من عيونه لالك؟ ليش و ليش و ليش كتير في أسئلة بدا أجوبة منطقية، بس للاسف الاغلب ما بحسو بالفرحة مع الطفل. ما بحسو انو العمر عم يمر بسرعة و كل ثانية راحت ما رح ترجع. كمية العنف يلي موجودة اتجاه الطفل بتوجع القلب. رجاء، حبو ولادكن كتير و اهتمو فيهن،و احمدو الله على هل النعمة. شاركوني أجوبتكن 👇❤️ #منتسوري_ماما_رشا #أمومة_رشا

اي حدا بشوف الصورة بقول نيالها عايشة براحة بال. للأسف الناس الها الظاهر فقط. راحة البال ما اجت بسهولة، التأقلم على حياة جديدة ما اجت بسهولة، بناء أسرة أمر مو سهل ابدا. الحياة الزوجية كتير حلوة بس في أمور كتير لازم تكون موجودة لحتى نقول انو ماشين بطريق صحيح. حياتنا كتير تعرضت لامور صعبة و مطبات كتير،بس الشي الواحد يلي ما نهز فينا الثقة المتبادلة يلي الموجودة عنا. الثقة بين اي تنين مهمة كتير لحتى يقدرو يكملو حياتن. الاحترام المتبادل لازم يكون موجود و ضروري جدا. الاتفاق على افكار وحدة، و الاتفاق على اتخاد القرار الصح بحياتنا و بحياة ولادنا. في كتير أمور بكون القرار مني لانو انا درست اكتر بمجال الامومة و صار عندي خبرة واسعة بهاد المجال، فهو عطيني الصلاحية باتخاذ معظم القرارات. دوره كأب مهم كتير و كلمته مسموعة بأسلوب صحيح. تربية زوجي لأحمد و كرم مهمة و في أمور لازم يكون هو صاحب القرار. المحبة موجودة و عم تكبر كل يوم، بس مو هي الأساس، الأساس هو طريقة تفكيرنا و تعاملنا مع بعض. هو ساعدني كتير بأمور كنت فاقدة الامل منها، ساعدني كل يوم لحتى كون قوية و اتحدى المصاعب. بيساعدني كتير بالاولاد،بس لما يكون تعبان ما بضغط عليه ابدا، بالعكس راحته مهمة لالي،لانو هو كمان بتهمو راحتي. الطمأنينة الموجودة ببيتنا ،نحنا الاتنين صنعناها. نحنا الاتنين وقفنا جنب بعض و ساعدنا بعض. مافي علاقة مثالية ،ومافي بيت مافي مشاكل. بس في علاقة أساسها الاحترام و هاد بكفي. وانتو كيف تعاملك مع ازواجكم؟ 👇♥️ #أمومة_رشا

مبارح وصلوني هدول الأغراض الحلوة من @best_mom_72 اليوم حطيتن لأحمد و كرم و طبعا طار عقلن فيهن، و ضلو قاعدين عليهن ساعة و نص. أول مرة احمد و كرم بيقعدو كل هل الوقت. رح احكي عنهن بالتفاصيل. النحلة السعيدة: أحمد و كرم ركزو كتير فيها خاصة بالملقط الموجود معها، و لعبو فيها ب كذا طريقة(ابتكار). لعبة الذاكرة: تحت كل غطاء في صور و لازم يلاقو الاشكال المطابقة. قاموسي الأول : عبارة عن دفتر و معه قلم بينحط فيه ماء، و بس يكتبو في بيظهرو الألوان تبع الرسمة(الاشكال مكتوبة بالعربي و الإنكليزي). اقواس الألوان : عبارة عن أقواس بألوان قوس قزح، و فيهن يبتكرو كتير أشكال و يتعلمو منهن كمان، بيتعلمو( الالوان، ترتيب الاشكال من الأكبر للأصغر و بالعكس، و احمد حب يحطن و يفوت القطار من تحتن). سباق السيارات: عبارة عن اربع سيارات، مجرد ما نحطن بينزل لحالن، و طبعا احمد كتير انبسط فيها. أداة الأشكال: عبارة عن عدة أشكال و معهن عدة كروت ،و منعمل كل شكل متل مو موجود بالكرت من الدوائر و الاشكال الموجودة كتير حبيتن، و فينا كل مرة نلعب فيهن بشكل مختلف. خبروني بتختار أدوات او العاب بتشغل العقل لاطفالكن؟ 👇♥️ #أمومة_رشا #منتسوري_ماما_رشا

روتين احمد و كرم تغير لما دخلو على الروضة، بس مع هيك خليت الأساسيات يلي منعلمها من قبل.👍 احمد عمره ٣ سنين،كرم سنتين و دخلو على الروضة لاني بحب ولادي بعمر السنتين يختلطو مع الأطفال اكتر و ينطلقو بالكلام(هاد الموضوع رأي شخصي ومو شرط ينطبق عليكن) الاولاد بيصحو على الساعة ٦ الصبح، و بعدين بغسلو طبعا و بغيرو البيجامات، بجهز فطور خفيف و على السريع(و بكون من اختيارهن). و بقعد شوي معهن لبين ما اصحى و نردد كلمات المحبة الصباحية. بعد هيك بلش جهز lunch box تبع كل واحد ،بحب جهزهن بنفس اليوم مو قبل بيوم، و هنن بيختارو يلي بدن بس دايما بحرص يكون في (سندويشة، نوع من الخضار، نوع من الفواكه، غذاء بسيط معكرونه بلبن مثلا، زيتون شرائح لان كتير بحبو) و على الساعة ٧:٣٠ بروحو من غير شر. بيرجعو على الساعة:١:٣٠/٢ الضهر، بغسلو ايديهن(هاد الشي ضروري جدا) و منتغدا(اغلب الاحيان ما بيرضو لان بكونو أكلو). على الساعة ٣ العصر ممكن يشوفو تلفزيون لمدة نص ساعة أو اكتر بشوي. على الساعة ٤ منعمل مراجعة خفيفة لا تتجاوز ال ربع ساعة من (أحرف، أرقام، أو أي شي جديد اخدو) و ممكن بعد هيك يشوفو تلفزيون كمان شي نص ساعة أو اكتر بشوي على ٥:٣٠ العشاء، و بكون زوجي بالبيت بهل الاثناء، و بضلو يلعبو و ينطو و يقرأو قصة( اذا بدن طبعا). على ٦:٣٠ حمام و على التخت. في تغيير بسيط بس بصراحة بحب هاد البرنامج يلي عاملته كتير مريحني وما بحس حالي مضغوطة ابدا. (بعتذر عن ذكر اسم الروضة) و انتو كيف روتينكن بأيام الروضة/المدرسة؟👇♥️ #أمومة_رشا #منتسوري_ماما_رشا

احمد عم يبلش يتعلم كيف يكمش القلم و يمشي على الخط المنقط. (هيك عندن بالروضة) (احمد عمره ٣ سنين) طبعا انا ضد انو الطفل يكتب بهاد العمر، بس احمد حابب الفكرة كتير ، و هو يلي طلب انو يكون عندو متل هدول الأوراق (يوم الخميس بيبعتو معه كل الأنشطة و الأوراق يلي عملهن خلال الأسبوع، ولما شاف الورقة تبع الروضة قلي بدي متل هي). جمعت مجموعة أوراق بعدة أشكال و أحرف و أرقام. طبعا ما رح قدمهن كلن سوا، حتى كل مرة ممكن يعمل بس شكل او حرف. ما زال هو بدو فخلص ما عندي مشكلة أنو يحاول. الأوراق طبعتن من غوغل، و اذا حابين ابعتلكن ياهن تكرمو يا أحلى متابعين(بعتولي على الخاص). بتمنى كون فيدكن. #أمومة_رشا #منتسوري_ماما_رشا

كيف فينا نكون اهل جيدين؟ كيف فينا نعلم الطفل على كلشي من حواليه؟ كيف فينا نعلمهم الاحترام للناس؟ كيف فينا نعلمهم الصح من الخطأ؟ أدركت ماريا مونتيسوري أن تعليم الطفل اسلوب الحياة يبدأ منا كأهل. مو مطلوب منا نكون ممتازين و اكيد مو مطلوب نكون مثاليين، بس مطلوب منا نكون عم نتصرف و نحكي بأسلوب صحيح و نعلم الطفل دايما الصح من الخطأ. التكرار على مسامع الطفل رح يوصلنا لنتيجة أكيدة. التقرب من الطفل و نحسسه انو هو معنا بأمان رح يطلع بالمستقبل واثق من نفسه. ما نحكم على الطفل قبل ما نشوف تصرفاتنا معه. ما نحكم على الطفل اذا عم يكبر و عم يتغير بكل مرحلة من عمره. ما نلومه على احراجنا أمام الناس(نعلمه كيف يتصرف) نعلمه انو الحرية ضمن حدود. الطفل مرأة اهله،و كيف منحكي و منتصرف هو رح يتصرف بحياته. مهمتنا نسأل ناس دارسين بمجال الطفل، نقرأ كتب تساعدنا بالتعامل معه، نبحث و نطلع على مقالات موثوقة. ما نقول ابني هيك و مستحيل يتغير، ما نقول ابني رح يجنني و كرهت عيشتي منه. التربية رحلة فيها مصاعب و فيها أمور حلوة كتير،و العمر عم يمر بسرعة و الاولاد عم يكبرو بسرعة ، لايمتا بدنا نضل عم نعامله بطريقة ما تليق فيه. بكفي ضرب،بكفي قهر للطفل، بكفي صراخ،بكفي قسوة، بكفي نشوف دموع أطفالنا بحجة عم نعلمه. الطفل نعمة من رب العالمين و في ناس مشتهين يسمعو كلمة ماما(وانا كنت وحدة منهن). حبو ولادكن و شوفو الدنيا اديش حلوة بعيونن. #أمومة_رشا #منتسوري_ماما_رشا

من اول ما نفتح عيونا  منفكر كيف بدنا نبلش هاد اليوم، و فورا منحضر الفطور و منجهز الاولاد على الروضة/المدرسة او حتى لو بالبيت منفكر كيف بدنا نسليهن. و التفكير الدائم منا كأمهات كيف بدي علم ولادي انو يعتمدوا على حالن و ياكلو لحالهن و يقومو بواجباتن على أكمل وجه. و طبعا هاد الروتين اليومي عند اغلب الأمهات، و منصير نشوف اديش باقي من الوقت لحتى ينامو و نرتاح شوي(من غير شر). طيب لو فكرنا للحظة وحدة بس انو نتواصل مع أطفالنا بطرق مختلفة. كيف يعني؟ نحنا عم نقوم بكل الواجبات و نقدم الأفضل دايما لاطفالنا ،بس الطفل بدو شي تاني تماما. ابتسامة من أم لطفلها بتخلي ينسى الدنيا كلها. التواصل عن طريق العيون(النظر بعيون الطفل بتخلي يحس بالأمان و الحب). التكلم معهن عن كيف كان يومهن بالمدرسة/الروضة و نحسس الطفل انو نحنا مهتمين نعرف شو صار معه خلال النهار. سماع حديثه للأخير. مناقشة الأمور الصعبة يلي حاسس فيها. العناق المتبادل (نوع من الحب و العطف). نعاملهن باحترام و تقدير (لحتى يبادلونا هاد الشي). امور بسيطة جدا و فينا بأي لحظة نعملهن، وما لازم نحط أولويات الحياة على حساب أطفالنا. خبروني عن الطرق تبعكن بتعاملكن مع أطفالكن👇❤️ #منتسوري_ماما_رشا #أمومة_رشا

من فترة لاحظت على أحمد تصرف جديد. كل ما احكي على التلفون او احكي مع حدا موجود عندي بحاول يقاطعني و بطريقة كتير قوية (عن طريق الصراخ، النق المتواصل،الصوت العالي) مع العلم انو انا برد عليه و ما يطنشو ابدا ،بس هاد الشي بصير عند اغلب الأطفال و يلي هو (لفت النظر و مقاطعة الأم عن أي شي عم تعمله و الانتباه الكامل لازم يكون له). لما كنت ادرس مونتيسوري كان عنا محاضرة بعنوان(المقاطعة) كيف لازم نعلم الطفل عدم المقاطعة عند الكلام و انتظار الدور، و بكون مقاطعة الحديث فقط عند الضرورة (دخول الحمام، أو أي شي اضطراري). الطريقة هي: لما الطفل بدو شي ضروري بحط ايدو على كتف الأم و بصوت منخفض بيحكي يلي بدو. طبعا خبرنا احمد انا و زوجي عن الطريقة و شرحنا بالتفصيل عن الأمر، هو صفن و حسينا انو ما كتير فهم علينا. اتفقت انا و زوجي نمثل الموضوع قدامه. تاني يوم زوجي عمل حاله انو عم يحكي على التلفون و انا اجيت بدي احكي معه عن شي ضروري و عملت نفس الطريقة (حطيت ايدي على كتفه و حكيت بصوت منخفض). احمد ضحك و قلي صح ماما. و مرة عن مرة صار الموضوع يزبط اكتر لحتى صار احمد يتصرف متل ما علمنا. احيانا الطفل ما بيستجاب بالحكي و بدو يشوف بعينه كيف يتصرف. خبروني عن طريقتكن بتعليم الطفل عدم المقاطعة👇♥️ #أمومة_رشا #منتسوري_ماما_رشا

احب الأوقات على قلبي لان كلنا منكون اغلب الوقت مجتمعين و برأي انو هاد لازم يكون وقت التواصل العائلي. هي الفترة حسيت انو الاولاد كل ما بدنا نقعد كرمال ناكل عم يعملو شي جديد (شي ما حبنا الاكل، شي ما بدنا ناكل غير على الكنباية، ماما بدي وقف وانا عم اكل، ماما شوفي شلون عم نط) و بعدين شو هل القصة الجديدة.🤔 فكرت و قررت اني اعمل أمور جديدة و قواعد جديدة للأكل: صرت نوّع بالاكل لحتى ما يكون عندن حجة انو ما بدن ياكلو(اعمل طبختين ما بدن وقت ولا شغل كتير). يجهزو السفرة معي (اذا بدن مو إجباري) (حطيت ورقة كرمال يعرفو كيف) يختارو المكان يلي حابين يقعدو فيه، و اشرحلهن انو هاد المكان ما رح يتغير لتخلصو اكل. طبعت اورق و علقتها بغرفة النشاطات كرمال يتزكرو القواعد الجديدة. يختارو لون الصحن يلي بدن ياه (عم جيب صحون ملونه من ايكيا نوع من التغيير). الممنوعات: الركض وراهن كرمال ياكلو مرفوض تماما. التلفزيون مطفي(هاد وقت التواصل الأسري). الاكل على الطاولة فقط و الصحن بضل على الطاولة. هاد الكلام بطبقو بالبيت اما برا البيت فصرت نادرا ما اطلع على مطعم كرمال ما يدايقو و بهمني راحتن(رأي شخصي) ،و اذا رحنا اكلنا بالمول فأغلب الوقت ما بحس بطعمة الاكل لان بضل لاحقة كرم😂. اذا بدكن الأوراق تكرم عينكن بعتلو على الخاص لابعتلك ياهن خبروني كيف بتخلو أطفالكن يقعدو وقت الاكل👇❤️ #منتسوري_ماما_رشا #أمومة_رشا

كل أسبوع الاولاد عم يتعلمو اشياء جديدة بالروضة ، و عم لاحظ انو في أمور جديدة ما كتير عم تزبط معهن. و طبعا هنن حابين فكرة المصنف كتير ،و كتير عم يحبو يتصفحو. كرم بلش يحكي كلمات واضحة و عم يلقط بسرعة،طبعت أوراق و ضفتها للمصنف. (كرم عمره سنتين و بالروضة،ليش بالروضة؟قرار شخصي مو شرط ابدا الالتزام فيه). الاحرف: عندي لوحة عليها الأحرف و بشكل واضح جدا، بس حبيت اجمع أوراق عليها الأحرف الانكليزية و على كل حرف شكل مناسب للحرف. الحيوانات: كان عندي كتاب كتير حلو عن الحيوانات بس للاسف كرم شقه، طبعت أوراق عن انواع حيوانات مختلفة (كان بدي أشكال للحيوانات حقيقة بس ما لقيت).و كمان احمد رح يستفاد منهن. (رح علمهن الأسماء بالعربي و الإنكليزي) الالوان: حبيت اطبع أوراق بفكرة جديدة تناسب احمد و كرم(التطابق بين الألوان)، و من ضمنن في أشكال كمان للتطابق و رح نسمي الشكل يلي منشوفه. (رح علمهن الأسماء بالعربي و الإنكليزي) العكوس: هدول لأحمد ، طبعت أوراق بأشكال مختلفة لحتى يفرق و يفهم علي بطريقة سهلة بتناسب عمره. و اذا لقيت كرم مهتم رح علمه عليهن. (رح علمهن الأسماء بالعربي و الإنكليزي) فكرة المصنف كتير مناسبة لأحمد و كرم،و عم يستفادو بشكل ممتاز. اذا بدكن الاوراق،تكرم عينكن، بعتلو على الخاص لابعتلكن ياهن. بتمنى كون فدتكن. #منتسوري_ماما_رشا #أمومة_رشا

هاد كان سؤالي لالكن مبارح. اجاباتكن وجعتلي قلبي، ما شفت الفرح بكلامكن. الخوف ،الموت، التعب، المسؤولية ، الحياة الجديدة ، و غيرها كتير، زكرتوهن. مافيني انكر التعب المتواصل و قلة النوم، و التفكير الدائم بالأفضل هدول الأمور صعبة اكيد. كل حدا فينا تعرض لكلام و انتقاد و فرض رأي(و طبعا انا وحدة منهن). بعدي عن الكلام السلبي تماما، و لا تخلي حدا يأثر على قناعاتك و تفكيرك اتجاه طفلك(اذا حدا قريب كتير عم يدخل، الأفضل عدم المواجهة لحتى نختصر مشاكل، كلمة ان شاء الله برأي افضل شي لاختصار الحديث) الامومة صعبة صحيح بس كمان سهلة، و نحنا منخليها هيك. كل أمر بنمر فيه اذا كبرنا كتير رح يصير صعب علينا، بس اذا روقنا و فكرنا كيف بدنا نتصرف رح تزبط معنا. كل الأطفال بعذبو وكل الأطفال بمرو بمراحل جديدة كل فترة، طيب معقول نستسلم؟ اكيد لا، منفكر بحلول فورية. على فكرة انا مالي ام خارقة ابدا، بس انا واقعية و بفكر بإيجابية دايما. مع انو حياتي جدا مضغوطة و فيها أمور كتير مزعجة بس ما بحب استسلام للسلبية. كلمة ماما كتير بتروقني،ابتسامة من أحمد أو كرم بحس حالي بعالم تاني. التربية مشوار ممتع كتير، و بتخلينا نتعلم أمور جديدة بحياتنا ،و الأطفال هنن احلى شي بالدنيا. لا تضغطو حالكن، حبو حالكن،نظمو أموركن،لا تعصبو على اطفالكن هنن مالن ذنب بشي ابدا، لا تستني من حدا شي ابدا، انتي خلقي جو لحالك و لولادك. انا معكن و دايما موجودة لمساعدتكن، انا ام متلي متلكن. ما بحب شوف ولا وحدة فيكن زعلانه، انتو مسؤوليتي، انتو أشخاص مهمين كتير لالي. بحبكن كتير و ضلو دايما سالمين. #أمومة_رشا

أكتر الأحيان أطفالنا بيرفضو يلعبو لحالن و بدن يانا نلعب معهن، و ما بيرضو ابدا نبعد عنهن و بصيرو بيبكو كتير(هيك كان كرم). و هاد الشي بزيد من توتر الأم و بتحب انو طفلها يلعب لحاله شوي. حتى إذا الأم قررت تفوت على الحمام، فبصير انهيار شامل للطفل 😂و كأن الأم ما بصير تعمل شي ابدا😄😂. هاد الشي طبعا بيختلف من طفل لآخر و على حسب كمان عمره ، ممكن يكون عنده قلق الانفصال و هاد الأمر بكون طبيعي كتير. حتى إذا رحنا عند حدا الطفل بصير بيبكي و ببطل يلعب مع الأطفال التانين و بدو يضل جنبها(أولادي مر بهي الفترة). اكيد كتير من احلى الأوقات يلي منقعد فيها مع الطفل و منلعب معه،و بكون في تواصل مباشر بينا و بينهن، و منكتشف المهارات يلي عندن يلي عم تزيد بكل مرحلة من عمرن. بس اذا الطفل رافض تماما يقعد لحاله و بدو يضل محمول طول الوقت، هون بصير تعب مضاعف على الأم و بشوية أمور بسيطة رح نخلي الطفل يقعد و يلعب لحاله. ممكن نلعب معهن وقت منيح و بعدين منحط له أدوات او العاب ينشغل فيها فترة معينة من الزمن لبين ما تخلص الأم الأمور يلي عندا و أهم شي يكون قريب منها، كرمال يحس بالاطمئنان ،و اذا رفض منرجع منطمنه انو نحنا جنبه و قريبين منه. اذا انتي بالمطبخ حطي جنبه و خلي يلعب بأعراض المطبخ (الطفل كتير بيستمتع). اذا كنتِ عند حدا ورافض يلعب مع الاولاد، بتروحي و تقعدي معه و تلعبي معه ومع الاولاد التانين و هيك هو رح يحس الراحة اكتر. و أهم شي لا تنزعجي من تعلق طفلك الزائد فيكي ،هاد الأمر طبيعي كتير،و حاولي تنظمي امورك لما يكونو نايمين او بالروضة /المدرسة. يتبع.... خبروني كيف بتلهو أطفالكن شوي لحتى تنجزو الأمور يلي عندكن👇❤️

طبعا متلي متل أي أم أطفالها بيتعقلو فيها بكل مرحلة من عمرهن. أحمد كان متعلق فيني بطريقة مختلفة كتير عن كرم(كرم كان اكتر و كتير كان عليه صعب انو ما يلاقيني جنبه). اتبعت أمور بسيطة كتير و بصراحة فادتني كتير لحتى اقدر حسسن بالانفصال عني بشكل تدريجي. العمل معا: كنت وما زالت بشارك ولادي بكل أعمال البيت،  وبحسسن انو هنن جزء من هي العيلة، و كتير منتسلا انا وياهن بالترتيب و التنظيف، كتير بساعدوني بالمطبخ و كتير بحبو هاد الشي،بخليهن يحطو تيابن الوسخة بالمكان المخصص، يجهزو بجاماتن قبل النوم، يحضرو السفرة و الأمور البسيطة. بهاد الامور بخلص شغلي و هنن معي وما بحسو اني بعيدة عنهن. فهم الطفل: أهم شي عندي اني افهم ولادي و افهم مشاعرن وما يحسو ابدا اني بعيدة عنهن، جملي الأساسية يلي بقلن ياها(لا تخاف انا دايما معك) (انت منيح، بشو حاسس) (اذا حاسس انو بدك تبكي ابكي، انا جنبك و حاسة فيك). مشاعري اتجاهن: مشاعر الأم اتجاه طفلها كفيلة انو تحل اي مشكلة مع الطفل، ف كيف اذا حاسس بقلق الانفصال بس بنفس الوقت عم يلاقيني دايما موجودة. كيف يعني؟ لما بدي اتركهم شوي ليلعبو بحط قدامن متل ساعة رملية و بخبرن انو انا بالمطبخ و بس ينزلو كل الرملات تعو لعندي لان بكون صار الوقت انو نلعب سوا. او : انا بالمطبخ و لما بدك شي فيك تجي لعندي، انا دايما هون. أمور بسيطة كتير اتبعها معهن و لقيت نتيجة. الطفل كتير بخاف لما يلاقي امه فجأة راحت من قدام عينه، التدرج و الصبر و عدم التذمر منه رح نتخطى الموضوع بسهولة. خبروني كيف علمتو أطفالكن عن الانفصال عنهن بشكل تدريجي👇❤️ #منتسوري_ماما_رشا #أمومة_رشا

اغلب الأطفال بيرفضو المشاركة بألعاب و ما بدن لا أخواتن او اي طفل تاني يتشارك باللعب معن. و طبعا ولادي متل اي أطفال بيتخانقو مع بعض و ما بدن يتشاركو ابدا مع بعض بالألعاب او الأدوات. بصراحة الموضوع موتر جدا لالي كأم، و كان يصير نوبات غضب من أحمد و كرم بنفس الوقت. فكرت كتير و لقيت طرق نفعت معهن و صارو يتشاركو و مرة عن مرة عم يفهمو الموضوع اكتر. وقت محدد: لما بلاقي كرم حاول ياخد لعبة من أحمد و بالغصب و العكس طبعا، فورا بقول:كرم معك ١٠ دقايق لتلعب فيها و بعدين دور احمد، و بضل عم راقب الوقت و قبل ما يخلص الوقت بخبر كرم باقي مثلا دقيقة و بعدين بدك تعطيها ل أحمد. (الموضوع نجح بالتدريج و التكرار و مو بسهولة صارو يتقبلو بس نجحت لما صبرت و ضليت على موقفي). اللعب الجماعي: لما حس انو الوضع توتر كتير و صار في صراخ منهن، باخد اللعبة بكل هدوء و بقعد على الأرض و بخليهن جنبي و منلعب سوا فيها. انتو الاتنين: كل الألعاب و الأدوات الموجودة عنا هنن لأحمد و كرم ،و هاد الشي منوضحه كتير انا و زوجي لما منشتري اي شي، و لازم يعرفو انو مافي لأحمد شي و ل كرم شي تاني، هدول لالكن انتو الاتنين. حرية الاختيار: قبل ما يلعبو، بخلي احمد يختار يلي بده و كرم كمان نفس الشي و كل واحد بيقعد بيلعب شوي و بعدين بيعطيها لتاني اذا بدو ياها. الأطفال الاخرين: لما ولادي تعلمو على مبدأ المشاركة مع بعضن صارو نفس الشي يعملو مع الأطفال الاخرين(مافي شي بكبسة زر، كلشي بالتدريج و الصبر). بصير معي مواقف رفض من واحد منهن(متل ما حطيت على الستوري مبارح)، بس بهدوء مني و التذكير الدائم بالأمور يلي ذكرتها بيمشي الحال. التربية صبر ، و مافي شي اسمه كن فيكن، الطفل بدو هدوء و طولة بال كتير لحتى يتعلم الصح دايما. خبروني كيف علمتو أطفالكن المشاركة؟ 👇❤️ #منتسوري_ماما_رشا #أمومة_رشا

عمر و عم يمر بسرعة ،عشنا الأمور الصعبة و الأمور الحلوة. كنت كتير اسمع انو احمد مستحيل يتقبل كرم أد ما حاولت، بس صممت و صبرت و حققت يلي ببالي. احمد و كرم هلأ أعز رفقات، دايما مع بعض ،بخافو على بعض كتير. الحمد الله اني صرت أم و صرت احتفل بولادي. كل يوم بمر بتعلم منكن أمور كتير. بشوف الحياة الحلوة من عيونكن، انتو رفقاتي و أقرب الناس لالي. بحب عيش معكن بفرح. بحب كون قريبة منكن. بحب شوفكم عم تختارو يلي بدكن بالحياة. انا و بابا فخورين فيكن كتير. أحمد فرحة عمري. كرم نبض قلبي. الله يحميكن يارب. (اليوم ساوينا عيد ميلاد احمد و كرم بالروضة) (احمد عمره ٣ سنين) (كرم سنتين)

مرقت الايام واحمد مصر على عدم رغبته بوجود كرم بشكل نهائي، و مشي احمد على السنة و ٥ شهور، و بطل يحكي احمد ابدا غير ماما و بابا و بالزور يقولهن، طبعا فورا رحت على الدكتور و أكدلي انو الموضوع نفسي و مع الوقت بيمشي الحال، و نصحني سجلو بروضة نظامها متل المدرسة. و سجلتو على عمر السنتين و الحمد الله بلش يحكي، و أموره كانت تمام. و هو لسه رافض كرم و كتير يصير عنده نوبات غضب، وكان يوقف على بابا البيت و بدو كرم يطلع و يبكي😟 كل يوم قريب الساعة، بس هدوئي بهي الفترة كتير ساعدني ، و قربت كتير من أحمد، و صرت حسسو بأهميته بحياتنا، و صار بس يرجع من الروضة يكون مشتاق لكرم كتير بس ما يظهر دايما.♥️ و انا ضليت مصرة على قراري انهن يكونو قراب كتير من بعضهن. صرت بس بدي اشتري العاب او أدوات قلهن هي الكن انتو الاتنين. و فهم احمد انو كلشي بالبيت لالكن ،و كرم الو وقت ليلعب متلك تماما.👍 طبعا احمد يرفض اغلب الوقت، بس ضل مصرة.👍 طول الوقت ردد على مسامعهن، احمد بحب كرم و العكس، انتو اخوات، انتو دايما مع بعض.❤️ اطلب من أحمد يطعمي كرم، يهتم فيه، يساعدو بالمشي و بالحكي، بس بدي اشتري شي لكرم خلي أحمد يساعدني.❤️ لحد ما نقلت كرم على غرفة احمد، و هون المفاجئة الكبرى لالي، احمد قلي ماما انا بحبو كتير لكرم، خلي معي دايما.❤️❤️ و صارو طول الوقت مع بعض و بس نطلع احمد دايما منتبه على كرم. بصراحة الموضوع اخد وقت منيح بس ولا مرة يأست و الحمد الله هلأ هنن احلى رفقات و اخوات.♥️🌺 قصتي الحزينة خلصت بس الفرح بلش بحياتنا و قصصنا الحلوة مكملة و ان شاء الله دايما بكونو مبسوطين.♥️ الله يحميهن و يحمي ولادكن يارب.♥️ خبروني كيف قدرتو تتغلبو على الغيرة بين أطفالكن؟ 👇❤️ #منتسوري_ماما_رشا #أمومة_رشا

اختيار المدرسة أو الروضة المناسبة للطفل من أهم الأمور يلي لازم نفكر فيها من كل النواحي. هي المرحلة بحياة الطفل لها أهمية كبيرة. من الأساس لازم تكون مدروسة بطريقة صحيحة مو بس سجلنا طفلنا بأي مكان لحتى يتلقى تعليمه. أول شي رح احكي عن المقارنة بين المدارس التقليدية و المدارس يلي بتتبع منهج مونتيسوري. الفرق كبير صراحة. المدارس التقليدية بتفرض على الطالب كل يوم مواد معينة لحتى يدرسها، حتى المعلمة بتطعي الدرس أمام الطلاب و بتقرر شو الطالب بحاجة ليتعلم، و غير طبعا اسلوب الفرض من قبل المعلمة لحتى يتلقى المعلومة. اما مدارس مونتيسوري، فالأمر مختلف تماما، بتكون العلاقة ديناميكية بين الطالب، المعلم و البيئة يلي بدو يدرس فيها. بيئة مونتيسوري لها اسلوب معين، لازم تكون الأدوات مرتبة و نظيفة و موجودة بشكل كامل على رفوف داخل الصف، و هون الطفل له حرية الاختيار بتعلم المادة او النشاط يلي بدو ياه بدون أي ضغط او إجبار نفسي من المعلمة للطفل. دور المعلمة فقط مراقب للطفل و بتصحح الخطأ بعد انتهاء الطفل من النشاط. و طبعا بكل صف في اعمار متفاوتة لحتى الطفل الأكبر سنا يساعد الأصغر منه. كل صفوف مونتيسوري تشمل مواد تعليمية مهمة لبناء عقل سليم للطفل، عدا انو الطفل هو يلي عم يشتغل بايديه، و عم يفكر بكل نشاط بنفس الوقت. و لكن للأسف اسعار هيك مدارس عم تكون غالية كتير لدرجة احيانا بعض الاهل عم يفضلو التعليم التقليدي. يتبع... خبرونو عن رأيكن بالفرق بين المدرستين؟ 👇❤️ #منتسوري_ماما_رشا #أمومة_رشا

اختيار المدرسة المناسبة من أهم الأمور بالنسبة للطفل قبل الاهل. ملاحظة مهمة: الأمور يلي هلأ رح اطرحها مو شرط ابدا تناسبكن بس ممكن تاخد افكار منها. السن المناسب و نوعية الطفل: بحسب منهج مونتيسوري ينصح بدخول الطفل بسن سنتين و نص لل ٣ سنوات،لاختلاط الطفل مع كافة فئات الطلاب و يصير اجتماعي اكتر. نوعية الطفل :كل طفل مختلف عن الاخر، ممكن يكون الطفل ماله بحاجة لدخول المدرسة بهل السن المبكر لان الطفل عم يستوعب و يتعلم بشكل كامل بالبيت، وممكن يكون في تأخر عند الطفل بالكلام و هون ينصح بدخول المدرسة أو الروضة لحتى ينطلق بالكلام.(متل احمد). اهم الأمور يلي لازم نبحث عنها: نوعية التعليم : هي النقطة كتير مهمة، بالنسبة للروضات اذا نحنا حابين نعلم أطفالنا بسن صغير لازم نختار روضة بتكون بنظام مدرسة(متل روضة احمد)، كل روضة بكون فيها كل أسبوع برنامج بيعطى للطفل على حسب عمره و بنفس الوقت ما يحس الطفل بالضغط عليه بالمدرسة بعمر صغير(يعني النشاطات مهمة كتير خلال الدوام). النظافة: لازم نعرف و نتأكد انو المدرسة نظيفة كتير، خاصة الحمام(هي الأمور بتشوفها الأم خلال الزيارة الأولى للمدرسة قبل التسجيل). ثقافة المعلمة: من الضروري تكون معلمة الصف على اطلاع بالتربية و أمور الطفل، لانو طفلنا امانه عندن و التعامل الصح هو يلي رح يجيب نتيجة إيجابية على نفسية الطفل. الأخطاء الشائعة: قرب المدرسة: كتير من الأهل بيختارو المدرسة على اساس انها قريبة من بيتن و بينسو الأمور الضرورية يلي زكرتها من قبل. عمل احد الأقارب في المدرسة: ممكن يكون هاد الشي إيجابي بس احيانا ممكن يكون سلبي، لانو منسمع تقييم المدرسة من قبل الشخص يلي عم يشتغل فيها و ما منسأل على الأمور الضرورية. اختيار المكانة الاجتماعية: هي الظاهرة كتير عم تنتشر بصراحة، معظم الاهل عم دور على المدارس الغالية و برأين انها الأنسب، و طبعا مو كلشي غالي منيح و ممتاز، الأمور ابدا ما تتاخد بهيك شي. يتبع.... لازم ندور كتير على المدرسة أو الروضة المناسبة وما نختار بسرعة، التروي كتير مطلوب. خبروني عن الأمور المهمة يلي بدورو عليها باختياركن للمدرسة او الروضة؟👇♥️ #أمومة_رشا #منتسوري_ماما_رشا

من الأمور المهمة يلي لازم نركز عليها و هي استعداد الطفل للعام الدراسي(مدرسة او روضة). الجانب النفسي كتير مهم للطفل ، خاصة للأطفال يلي بعمر صغير. اهم الخطوات يلي لازم نتبعها: التحدث مع الطفل: بعض الأمهات بتفكر انو اذا الطفل صغير ما رح يستوعب الكلام الموجه له، و بالعكس تماما الطفل بيفهم و بيستوعب كل كلمة عم نحكيها بس ممكن ما يقدر يعبر بالكلام بس رح يرسخ بعقله الحكي. نبلش بالكلام معه من قبل بالاسبوعين ومنفهمه شو المكان يلي رايح عليه، و انو رح يغيب شوي عنا بس رح يكون كتير مبسوط. تنظيم موعد النوم: اذا الطفل تلخبط نومه خلال فترة الصيف، نحاول نبلش بالتدريج ليرجع وقت النوم المناسب بين (8-8:30). ضغط الاولاد: اذا ابنا بمرحلة دراسية، ما نحاول نضغط عليه بالمراجعة و نبلش بتدرسيه قبل المدرسة، ممكن كل يوم نراجع معه شوي. الأمور الأساسية. وجود الأم : هي النقطة كتير مهمة خاصة اذا الطفل اول مرة بروح على الروضة، ما نتركه فورا على باب المدرسة و نخلي يبكي، لأن رح يصير عنده ردة فعل عكسية، نحاول انو نضل معه اول ساعة أو ساعة ونص و طبعا نحنا عم نخبره انو بعد شوي رح روح و برجع باخد، و طبعا ما تختفي الأم بدون ما تخبر طفلها انو رايحة. بكاء الطفل: هاد الأمر كتير طبيعي، بس لازم نعرف انو المعلمة عندها القدرة انو تسيطر على البكاء (بالحنية ، و التعامل الصح مع الطفل)، و نحاول ما نترك الطفل اول كم يوم فترات طويلة يعني بعد ساعتين بالكتير ترجع تاخده، و بشكل تدريجي منأخر المدة لحتى تصير لآخر الدوام. شراء لوازم الطفل: لازم نشارك أطفالنا بكلشي بدنا نشتري لالهن، ونخلي لهم حرية الاختيار. المدرسة أو الروضة شي لابد منه، و لازم نعرف كيف نتعامل بهل الأمر الجديد على الطفل. خبروني كيف هيأتو طفلكن لهل المرحلة الجديدة بحياته؟ ❤️👇 #منتسوري_ماما_رشا #أمومة_رشا

اليوم صحيت الصبح و كل المؤشرات بتدل على انو اليوم سلبي كتير و بقوة. وحتى فقت مالي رايقة ابدا. بس تحديت حالي و قررت عيش الايجابية بكل اليوم، و قررت حسس الناس يلي حوالي بهي الطاقة. و فعلا كمية المسجات و الدعوات الحلوة يلي وصلتني كانت رهيبة. حسيت بشعور السعادة و التفاؤل، لأني كنت سبب بفرحكن. دائما عندي قناعة بيني و بين حالي انو اذا انا مبسوطة لازم الكل يكون مبسوط و مرتاح. دائما عندي امل انو كل يوم لازم يكون إيجابي. عندي امل برب العالمين انو دايما بيخترلي الخير بكلشي بعمله. محبتي لالكن كتير كبيرة، و عطائي مستمر دائما لكل حدا فيكن. كل أم هي أم رائعة. كل أم هي ناحجة بحياتها. كل أم عندا طاقة رهيبة من المشاعر الحلوة. محبتكن لالي عنجد كتير بقدرها، ولا تفكرو أنو يجي يوم و اتخلى عن مساعدة اي حدا فيكن. بحبكن من كل قلبي و بتمنى الخير لكل حدا فيكن. #أمومة_رشا

رشا كيف عم تربي ولادك بدون ما تكوني قاسية، بكرة ولادك بطلعو مايعيين؟ صبية بعتتلي هاد السؤال اليوم، و قلتلها رح جاوبك ببوست مفصل. مين قال انا مالي حازمة! مين قال أولادي ما عندن حدود! بس في أمر كتير مهم لازم نعرفه كأمهات (التربية مالها علاقة بالقسوة). انا ما فيني كون قاسية على ولادي واضربهم او صرخ عليهن، بس فيني كون حازمة بطريقة صحيحة. هل يا ترى إذا ضربت بكون ابني تعلم؟ هل إذا صرخت بوجه و صار يبكي بكون تعلم؟ الحزم كتير مختلف عن القسوة، لما ابني بيعمل تصرف غلط بيعرف اني بكون حازمة معه بطريقة كلامي. كيف يعني؟ بنزل لمستواه و بطلع فيه بكل جدية و حط عيوني بعيونه و بقلو مثلا:الضرب ممنوع،تصرفك غلط(مو هو الغلط التصرف غلط). لما قررت ربي على طريقة منهج مونتيسوري اول شي درسته انو الحرية تنعطى للطفل ضمن حدود. وانا كتير بدللن، كتير بسمعهن كلام حلو، كتير بحبن، بس وقت بيعلمو تصرف غلط بكون كتير جدية معهن. الله بعتلي امانه، و اذا ربيتن بطريقة سليمة رح كون انا الربحانة لان هنن رح يحبوني كتير و رح يكونو رفقاتي بالمستقبل. على فكرة انا كتير عانيت لصار عندي ولاد، لدرجة عملت طفل أنبوب وما نجح و بعد ٦ شهور طلعت حامل بدون أي تدخل طبي، و رزقني كرم من غير ما كون حاسبه انو بدي ولاد. عندي ولادي بالدنيا كلها، و تعاملي معهن هو يلي رح يخليهن ناجحين بحياتن. دايما بقول بيني و بين حالي (يارب تكون رضيان على تربايتي)، اول شي ربيت ولادي عليه الدين و بفهمهن كلشي عن الدين بطريقة تناسب عقلهن. الله يحميهن و يحمي ولادكن. خبروني كيف تعاملكن مع اطفالكن؟ 👇♥️ #أمومة_رشا #منتسوري_ماما_رشا

تنظيم وقتي خلال أيام الروضة : من أهم الأمور يلي بحب اتبعها بحياتي هي التنظيم، وقتي ايام الروضة جدا ملخبط و كتير معجوق، مشان هيك ما بدي انسى ولا أمر مهم خلال اليوم. هي السنة احمد و كرم بالروضة اذا الله راد، ولازم كون منظمة و حريصة على وقتي مشان ما يروح بلا طعمة. طبعت هدول الأوراق من غوغل لحتى اكتب عليهن كل يوم شو بدي. أول ورقة  بتكون لمدة شهر(كل شهر بغيرها او فيني حطها بإطار متل البرواز تبع الصور و بكتب عليها بقلم سهل المسح، هيك أوفر). بحطها بمكان مناسب لالي، انا بعقلها على البراد بالمطبخ او اذا بإطار بحطها على الحائط بالمطبخ. بكتب عليها اسم الشهر و كل يوم بحط الأمور يلي لازم ساويها، وكمان بسجل عليها أمور بتخص أحمد و كرم(من مراجعة للمواد، أو إذا عندن شي مهم بالروضة مشان ما انسى).و اذا عندي ملاحظات خلال اليوم كمان بسجلها. الورقة الثانية(الوجبات): هيك بصير بعرف كل يوم شو بدي ابعت معهن على الروضة و حتى بنظم وجباتي خلال اليوم(فطور، غذاء، عشاء). بهي الطريقة رح كون منظمة و ما رح يضيع على شي ابدا. اذا حابين الأوراق بعتلو على الخاص لابعتلكن ياهن. تكرم عينكن احلى متابعين خبروني عن طريقتكم بتنظيم يومكن خلال أيام المدرسة أو الروضة؟ 👇❤️ #منتسوري_ماما_رشا #أمومة_رشا

انتشرت جملة بالاونة الأخيرة (اذا ما عم تطبقي منهج مونتيسوري معناتها انتي ام فاشلة)😳 أول شي مافي أم فاشلة ابدا، و لا تسمحي لحدا يحسسك بهاد الشي، انتي أعظم حدا بالعالم.❤️ تانيا التربية ما رتبطت بهاد المنهج، شو فكرة هاد الحكي!🤔 اذا انتي عم تربي تربية سليمة و عم تعاملي ابنك باحترام و حب، خلص وين المشكلة، وإذا ما عم تبطقي منج مونتيسوري وين الغلط، معناتها كلشي عم تعملي غلط؟!😤 اكيد لا، منهج مونتيسوري رائع و أفكاره كتير حلوة و من الواقع تبع حياتنا، ممكن تاخد يلي بيناسبك و تساوي و بس، انتي حياتك غير حياتي غير حياة اي أم❤️ كل أم تخلق جو لعائلها متل ما بيناسبها.❤️👍 مثلا انا قرأت كتير عن المنهج بكتب اجنبية و عربية و شفت فيديوهات كتير لاجانب و عرب، و بعدين حسيت هاد الشي مناسب لالي فدرسته.👍 دايما لاقي حالك وولادك بالشي يلي عم تعملي، لا تخلي افكار الناس تنفرض عليكي. و على فكرة المونتيسوري مو بس انشطة و انو رتبنا البيت على هاد المنهج، اذا انتي عاملة كلشي متل ما المنهج بيطلب بس ما عم تربي صح ،شو بتكوني استفدتي ؟!😥 أنا أخصائية مونتيسوري بس ولادي مو ٢٤ ساعة على الأنشطة، بيتي فيه زوايا مونتيسوري صحيح، بس عملتن لغرض معين، لاني حسيت انو بهي الطريقة رح يكون كلشي متناول بين ايدهن و يعتمدو على حالن، و هاد اكتر شي بهمني.🤝 المثالية بحياتي مرفوضة، و فرض رأي على الناس ممنوع من قبلي.👍 كتير منكن ما بوافقوني الرأي ببعض بوستاتي، طيب وين المشكلة، عادي كتير، مو المفروض بيعجبكن كلشي بس ممكن فكرة صغيرة تناسبكن.👍❤️ على فكرة السوشل ميديا فرض أراء وبس، وهاد الشي جدا مزعج. الله يخترلكن الخير بتربياتكن، و اكيد انتو احسن أمهات. شاركوني أرائكم. 👇♥️

كل أم فينا الها شخصية مختلفة عن الأخرى، و كل أم بتنقل سلوكها للطفل بشكل مباشر، لأنها بتقضي اكتر وقت معهن. رح أعرض شخصيات مختلفة من بعد مقالات قرأتها من فترة و حبيت شاركن فيها. الأم العصبية و دائمة التوتر: تكون الأم اغلب وقتها انفعالية كتير وردود فعلها سريعة و بعصبية، تعاملها بصراخ، و طبعا هاد تأثيره على الطفل كتير قوي(بيضعف شخصيته، خوف دائم من التعبير عن رأيه). طبعا بصير الطفل بيتعامل بنفس الأسلوب، لأن هو هيك عم يلاقي امه عم تتصرف. الأم القلقة بشكل مفرط: بيكون الخوف و القلق مسيطر عليها، و بزيد خوفها خاصة بعد الإنجاب، بتخاف على طفلها من اي شي، ما بتعطي حرية الاكتشاف، بتخاف عليه من اللعب مع أطفال اخرين، بتخاف لما بيروح على الحضانه او المدرسة، وطبعا بينتقل هاد الشي للطفل بشكل مباشر، بصير عنده الخوف من اي تجربة جديدة، و عدم الاعتماد على نفسه. حلو الاعتدال بالخوف. الأم الحريصة: هاد النوع من الأمهات دايمة الحرص و السيطرة على الأمور، و بتهتم بكل التفاصيل يلي بتخص عائلتها، فهي امرأة قوية جدا، و بتكون كامشة زمام الأمور بشكل صحيح. الأم المزاجية: مزيج من القلق و الغضب، العاطفة المفرطة، و أسلوب حياتها معتمد على نفسيتها، و اغلب تعصبيها هو عدم التنظيم بحياتها بشكل يومي. الأم الصديقة: بتكون قريبة كتير من أطفالها، بتحكي معهن،بتفهم مشاعرهم، قلقها قليل، بتحب دايما تلعب معهن، دايما المرح (حتى لو كانت بحالة مزاجية سيئة ، بتسيطر على تصرفاته). كل أم هي أم ناجحة و أم رائعة. و كلنا منحاول دايما السعي للافضل و ليس المثالية. خبروني أي نوع انتو من الامهات؟ 👇❤️ #منتسوري_ماما_رشا #أمومة_رشا

الملاحظة: من أساسيات مونتسوري انو نحنا نكون ملاحظين على أطفالنا طريقة تصرفهم بالحياة او بطريقة عمل النشاط. بحب دائما لاحظ تطور أطفالي كل فترة و لاحظ الأمور يلي عم تلفت نظرهن و ركز عليها اكتر. احمد و كرم مختلفين تماما بكلشي، كل واحد فيهن اهتماماته مختلفة. بحب لاحظ كل واحد فيهن بشو عم يبدع و اشتغل على القصة اكتر. كل فترة بيتعلقو بشي مختلف، مثلا: هل الفترة احمد عنده عشق للمفكات و البراغي و كل سيارة لازم يفكها ليعرف شو موجود جوا و بفكر كيف بدو يرجعها متل ما كانت، برأي هاد اسمه إبداع و كتير بنبسط لما يشغل مخه بطريقة تفيده. كرم عنده حوس هل الفترة بوضع المكعبات يلي بأجحام مختلفة فوق بعضها بطريقة صحيحة. عم وفر أدوات بسيطة كتير و بأسعار معقولة جدا. تركيز الطفل بموضوع بفيده شي جميل جدا، بينمي ذكائه، بيتعلم الصبر، طريقة تفكيره المتغيرة كتير حلوة و بتلفت النظر للأهل. كل طفل هو طفل ذكي جدا، ولكن بيتخلف كل واحد فيهن عن اهتماماته، حتى لو نفس العمر، عدم المقارنه شرط أساسي كتير. ترك الحرية للطفل باختيار الشي يلي بده ياه(طبعا ما يكون خطر عليه). خبروني عن إبداعات أطفالكن؟ ❤️👇 #منتسوري_ماما_رشا #أمومة_رشا

في كتير أمور بحياتي تغلبت عليها الحمد الله ومن ضمنها كثرة التفكير. انا كنت من الأشخاص يلي بفكرو بأمور كتير بنفس الوقت، و هاد الشي كان مسبب لي تعب كتير كبير، خاصة إذا تجاوز الأمر الحد الطبيعي. كنت أقلق كتير، وجع راس رهيب، ما اعرف حس بالسعادة يلي حولي. في أمور اتبعتها لحتى تخلصت من هاد الموضوع. تحديد الوقت: من أهم الأمور يلي ساعدتني على تجاوز التفكير، صرت حدد مدة زمنية لازم احسم القرار فيها و ما اتردد. الواقعية: انا ما بحب الكذب ابدا، وما بحب حسس حالي اني عايشة بحلم، دايما بسعى لحقق حلمي، و كتير في أمور تغيرت بحياتي لما اتخذت هي الخطوة. كتابة خطة لحياتي: الحياة كلها متغيرات مفاجئة بس دايما بحب كون عرفانه شو بدي اعمل و لوين بدي أوصل، و بحب اكتب كل الأمور يلي بدي اعملها، و بحب اعرف الصعوبات يلي بدها تواجهني قبل الإيجابيات لحتى ما اتفاجأ بعدين. كتير مبسوطة بحياتي الحمد الله، لاني صنعت الرضا و القناعة بحالي، إيماني و تقربي من رب العالمين كل يوم عم يزيد اكتر، وهاد الشي بصراحة بخليني مرتاحة كتير. خبروني عندكن هي الصفة بحالكن(كثرة التفكير)، و كيف تغلبتو عليها؟ ❤️👇 #أمومة_رشا

مساء الخير حبايبي : في أمور كتير بعملها مع أطفالي لحتى يطورو أكتر و تكون مفيدة لالهن بنفس الوقت. (ممكن ما تكون كل المبادئ تناسبكم بس فيكن تاخدو افكار منها). طبعا المبادئ يلي بدي احكي عنها من مبادئ مونتيسوري. -مراقبة أطفالي لمعرفة اهتماماتن يلي عندن و بخلي عندن المجال للاكتشاف بكلشي(بس ما يكون مضر او خطير). -عمل أنشطة للغة يلي بدي علمهن ياها(و غالبا انا بساويهن من أدوات بسيطة جدا) -انشاء المنزل بطريقة لحتى يتمكنو من خدمة أنفسهم بأنفسهم. -تشجيع فضولهم. -وضع قليل من القوانين لحتى يعرفو انو في حدود ومو كلشي مسموح. -بكون المراقب لالهن بالنشاط فقط و بس يخلصو النشاط ممكن صلح الغلط. هي الأمور كتير مريحتني بالتعامل مع ولادي، وعم حس عندن تقدم كل فترة بشكل ملحوظ. شاركوني المبادئ يلي بتتعامل فيها مع أطفالكن👇♥️ #أمومة_رشا #منتسوري_ماما_رشا